dina's storylineʕ•ᴥ•ʔ: Mat Tebok Story

#FANFIksi Refresh Author Stuff buddies

Mat Tebok Story


Ngingon Tuyu Mat Tebok ngingas lantak bandit yang nyangko dio pecak belis jero mimpi. Untunglah bandit tuh pingsan. Kareno kopinyo dem disiram ke rai bandit tuh, Mat Tebok mesen lagi di kantin parak kantor plisi. Dak lamo dari situ, Ujang datang samo rewang barunyo. Caknyo toke yang diajak si Ujang, terus Mat Tebok dikongkonnyo kenalan. Namonyo Mat Tombol, wong LSM yang lagi besiget nian cari cetukan tahun 2013. Dak pacak idak, pemilukada makin parak, jadi apo bae pacak dijadike lokak oleh Mat Tombol. “Kak Cik, Mat Tombol ni bukan tim sukses. Dio nak cari lokak pas pemilukada ni. Kalu bae pacak nolong,” uji Ujang ngolongi Mat Tebok. “Kagek dulu. Baru bae kenal nak berasan. Siapo nian kawan yang kau bawa ni, Jang. Namonyo nak nyamoi namo aku pulo, Mat Tombol. Gek ilang pamor anak mudo,” uji Mat Tebok ngomong samo Ujang tapi matonyo nukik ke Mat Tombol. “Kecik-kecik bae. Gek didengarnyo dak lemak,” uji Ujang bisikke Mat Tebok. “Katek lokak, dio tuh agak lambat dengar. Kalu wong nyebut lapan enam cepat bereaksi kupingnyo. Tau aku samo budak itu,” uji Mat Tebok. “Tabek kando. Aku ni nak bekawan. Kalu kamu kenal wong yang ngingon tuyul, payo kenalke samo aku,” uji Mat Tombol sambil ngenalke diri samo Mat Tebok. “Mun nak kayo, begawe. Jangan ngambek jalan pentas,” uji Mat Tebok. “Bukan peranti nyari tuyul yang galak maling duet. Tapi tuyul yang pacak dikongkon mindahke suaro pas pemilukada. Mak ini ari, ado dugaan banyak wong jual beli jin samo ngingon tuyul peranti menang pas pemungutan suaro,” uji Mat Tombol. “Masuk akal jugo,” simbat Ujang. “Daripada masuk sumur, apolagi masuk penjaro,” celetuk Mat Tebok. “Kalu ado. Berapo bae aku bayar. Tapi jangan mahal. Soalnyo tuyul tu nak kujual lagi samo tiap tim sukses,” uji Mat Tombol. “Tukang ulo jugo kamu beduo ni ruponyo. Nah, mun nak nangkep tuyul. Malam kagek kamu matike galo lampu di jero rompok. Terus kamu telanjang sambil nunggit kepala ke bawah,” uji Mat Tebok. “Gilo kau. Bukan tuyul itu yang dicarinyo,” uji Ujang ngocehi Mat Tebok. “Peh Tombol, kito pegi bae. Katek hasil ngaguki Mat Tebok. Keno kolahnyo terus kito kelamoan di sini,” uji Ujang ngajak Mat Tombol ninggalke Mat Tebok. (*)  Nerako Dunio ABES dari kunjungan kepala plisi ke kantor koran Kocek, Mat Tebok jalan-jalan ke pasar. Ado penjahat yang tetembak plisi dan koma di rumah saket. Dio bemimpi dibawa iblis ke nerako. Tapi dio tekejut nian waktu nyingok nerako rame nak matilah wong. Ado yang bejoget, bejudi, dan banyak pulo tino bohai. Langsung be dio menculat pengen masuk nerako, tapi dio ditahan oleh Iblis. ”Gek dulu lur, waktu kau belum tibo… Baleklah ke dunio dulu, buatlah yang lebih jahat lagi. Pasti gek kau masuk nerako!” Akhernyo penjahat itu dibalekke ke dunio dan dio bebuat lebih jahat lagi… Sampe akhernyo dio mati nian ketembak plisi. Dio di anter Iblis lagi masuk nerako. Tapi sekali ini dio tekejut bukan main, pas dijingoknyo di nerako banyak api di mano-mano, bauk amis darah dan bekeliaran binatang-binatang bebiso dan buas, di sano-sini tedenger suaro wong bejeritan mintak tolong dan kesaketan… Penjahat itu bingung dan ketakutan, dio betanyo samo iblis : ”Neeeeh, ngapo cak ini?? Waktu aku ke sini kemaren dak cak ini nerakonyo??” Iblis tesenyum dengan muko dak beduso…”Ohh, waktu itu kito lagi promo lurrr…” Penjahat tebangun, di depannyo Mat Tebok langsung nyiram mukonyo samo kopi. ”Kau kiro aku belis. Aku ni nak wawancara?” uji Mat Tebok ngingas, penjahat tuh laju pingsan. (*/ce1) Salah Lobang Kemaleman abes keno razia, Mat Tebok laju balek ke rompok ponakannyo di Sukabangun. Mat Tebok numpang tiduk karno besoknyo nak cari berita laen pulo. Pagi-pagi buto, Mat Tebok tebangun lantak suaro wong ribut. Ruponyo kampung ponakan Mat Tebok didatangi empat plisi, karno ado sikok jando yang disangko bandar narkoba. Dak taunyo warga sano dak nerimo, apolagi di kampung itu isinyo tentro galo.     “Apo nian kendak kamu plisi nak grebek wong kampung ini? Mano surat tugas kamu?” tanyo warga  yang jugo tentro tinggal di sano. “Kami dapet perintah. Ado SMS ke plisi kepala kalo di kampung ini ado bandar cimeng, ujinyo bandar tuh jando,” jawab plisi yang mimpin operasi. “Kamu tau dak isi kampung ini? Tentro galo, pacaklah kami ngeruanke warga di sini. Izin katek, surat tugas katek. Sudah grebek, dak dapet bukti pulo. Nak 86 apo cuman alasan nak betet jando kamu ni,” uji pentolan warga tuh. “Salah lobang dak kamu plisi ni? Jangan baseng grebek bae. Omongke kemendan kamu. Cek dukin, kalu bae SMS tuh nyasar. Brenti bae jadi anggota mun lokak salah tangkep, juaro salah tembak warga. Selobang sewang bae samo kami,” bentak warga laen yang besak tinggi berambut cepak ngagangi plisi. “Maaf bae galo-galo.  Gek kusampeke pesan kamu samo kemendan. Kami nak balek, numpang lewat,” uji plisi pas ketakutan pas dikepung warga yang bawa gelam, sento, cap garpu, teko sangkur samo senjato. Untunglah Mat Tebok ado di sano, mano ponakannyo baek samo warga kampung itu. “Tabek bapak-bapak, dulur seberoyot. Minta nyawo, plisi ni jangan digebuki. Cakmano kalo dikongkon balek dak becelano bae. Pacaklah aku bawanyo,” uji Mat Tebok nenangke warga. “Nak kau bawa ke mano wong empat ni?” bentak warga laen samo Mat Tebok. “Dimasukke koran samo tivi. Mangko jingok galo pas lagi dak becelano,” uji Mat Tebok langsung narik empat plisi tuh masuk mobil terus pegi ngindari kepungan warga. Plisi dianter Mat Tebok sampe markasnyo, idak lecet, idak sampe ditelanjangi. “Terimo kaseh nian dindo. Mun dak tuh kami la bengep-bengep galo digebuki warga,” uji plisi nak salam tempel ngenjuk Mat Tebok duit. “Dak usahlah Ndan kalo nak 86, mun 3355 payolah,” uji Mat Tebok nak masuk mobil. “Apo dio pulo artinyo tuh?” tanyo plisi ecak-ecak dak tau apo dak tau nian. “Wajar bae kamu plisi ni baru galo. Mestinyo maen pripitan dukin belatih ngatur lalu lintas jalan, idak langsung gerebek apo nangkep bandit. Kalu 86 duitnyo cuman puluhan sampe ratusan ribu, biasonyo dalem amplop. Mun 3355 pucuk sejuta, dikirim masuk rekening, pecak setoran ke bos-bos kito,” uji Mat Tebok ngedipke mato terus pamit ninggalke plisi. (*)Katek Cetukan Lego nian Mat Tebok motor barunyo dak jadi diambek plisi. Mat Tebok jugo laju kenal samo kepala plisi yang baru. Pas malem mingguan Mat Tebok yang baru beli motor ditantang budak-budak motor kebut-kebutan di jalan. Sialnyo, di jalan itu ado razia. Mat Tebok dewek yang ketangkep plisi, budak-budak motor tuh ngebut galo.  “Nah, kau ni ruponyo. ngapo kau ngebut sampe 120 km/jam???” tanyo plisi.  “Maaf, Ndan. Caro wong lagi ngejar berita,” uji Mat Tebok.  “Mun kau wartawan nian, tepakso kami tilang kareno ngebut,” uji plisi. Plisi nulis di buku tilang terus ngenjukke kertas bukti pelaggaran ke Mat Tebok.  “Alangke besak duit tilangnyo, Ndan. Kiro-kiro mun nak katek cetukan jangan bekais di jalan,” uji Mat Tebok, “Gek aku telepon plisi kepala dukin,” uji Mat Tebok dak lamo tuh plisi-plisi ditelepon kemendannyo.  “Ai kau ni. Ngapo nak nelpon plisi kepala nian. Urung laju lapan enam,” uji plisi ngoyakke surat tilang. “Sudah kuomongke dak pecayo,” uji Mat Tebok. “Ngapo kau ambek ati nian, awak kami ni cuman nak ngabisi tinta pena bae nulisi surat tilang kau. Dak usah nak ngadu ke plisi kepala nian,” uji plisi yang barusan keno sembur kemendannyo gara-gara nilang Mat Tebok. “Maaf bae, Ndan. Aku jalan dukin. Ngejar budak-budak motor tadi,” uji Mat tebok begancang ngidupi mesin motor terus pegi sengigikan jingok plisi ilang cetukan. (*)Mambu Tanah Dem bujuk samo nganter balek ceweknyo, Mat Tebok dapet kabar kalu wartawan dari segalo media nak demo di arah bandara lamo. Ruponyo, ado duo wartawan yang digebuki anggota pas lagi meliput bentrok warga empat kelurahan samo gerombolan tentro payung tuh. Selo dak selo nunggu kemendan yang nak didemo, Mat Tebok besiget nanyoi warga peranti nyari tau motif awal konflik tanah warga empat kelurahan samo tentro payung tuh.     “Ado yang tejingok dak kemendan tentro payung tuh ke mano?” tanyo Mat Tebok ke warga.     “Kalu bae dio lagi patroli keliling sekalian ngambek cukan tanah galian, samo setoran bangunan liar daripada ngaguki wartawan,” simbat warga yang ditanyo. “Oh, andaikato tentro payung tuh dipecongi kemendan katek aguk, bawa pesawat peranti ngunjali tanah, meledak di pucuk awan, terus campak numbur gunung. Berapo cubo warga yang selamat?” tanyo Mat Tebok. “Yang selamat segalo wong Indonesia!” jawab warga.      “Ngapo pacak cem itu?” tanyo Mat Tebok.     “Soalnyo cak ini Cek. Tau dak, mun ado cino kayo yang ngeduk tanah di sini. Kabarnyo dibekingi pejabat kota. Soalnyo berapo kali warga ngadu ke kota, tapi dak ditanggepi. Laju warga ngadu ke provinsi. Pecaknyo pejabat provinsi ni besaing samo pejabat kota, apolagi nak pemilukada. Nambah lagi ditimpo isu rencano proyek lapangan golf kelas dunio oleh wong luar. Bukan Mangkonyo kemaren warga ribut, kawan kamu wartawan melok jadi sasaran digebuki tentro payung,” jawab pentolan warga. “Oh, Pantesan. Media massa ni cuma jadi alat ruponyo, warga jadi korbannyo,” uji Mat Tebok ecak-ecak dak tau. “Wajar bae, mak ini ari mambu tanah galo pejabat kito. Teko tentro payung la melok ngeduk tanah. Ngapo idak ngeduk awan bae tentro payung tuh,” uji warga laennyo mulai ngingas. Mat Tebok pamit terus pegi ninggalke warga, kareno dak lemak, gek dak taunyo kemendan tentro payung tuh bekawan pulo samo bos-bos. (*)Keno Sita Sial nian Mat Tebok, malem mimpi dicekek pocong, siang ari tustelnyo keno sita bos. Soalnyo, tustel tuh dipinjem-pinjemke Mat Tebok peranti motret tino-tino bohai di kafe hotel. Pas pulo ado berita bagus, anggota pamong praja cabuli mahasiswi. Mesti katek tustel, Mat Tebok maseh beguyur pegi ke TKP. Mat Tebok nyangko, mungkin kareno dak kuawo nahan nafsu sering razia mesum di kafe, mangkonyo anggota pamong praja tu nekat betet mahasiswi yang dicewekinyo. Ujungnyo ketauan tula, mahasiswi tu ngelaporkenyo ke kantor plisi laju pamong praja tu ditangkep. Selamo di sel, anggota pamong praja terus mikir…pacak bae dio dipenjaro seumur idup mun dak tu disiksoi wong jero bui. Besoknyo pamong praja tuh disidang di pengadilan. Mat Tebok meloki terus kasusnyo. “Terdakwa dinyatoke besalah kareno sudah ngancurke masa depan mahasiswi. Kareno ado lapan enam dari kemendannyo yang gilo bebini dan biso jamin, mangko hukumannyo cuma tigo bulan penjaro,” uji hakim baru nak ngangkat pukul. Mat Tebok dak puas, tapi anggota pamong praja tu ,elincak-lincak kesenangan. “Kubesakke beritanyo. Mangko KPK baco maeh banyak hakim nakal. Mentang anggota pamong praja betet anak tino wong hukumannyo cuman tigo bulan penjaro. Woi hakim, berapo nian kau dienjuk duet kemendannyo,” uji Mat Tebok. “Dak usah ribut, denger dukin, aku belum sudah ngomong. Hukumannyo memang tigo bulan penjaro. Dengan catatan, alat yang dipake melakuke kejahatan disita oleh negara,” uji hakim ngetok meja pake pukul. “Nah, mun itu putusannyo, tambah kubesakke nian beritanyo. Mangko pejabat negara ato siapo bae kemendannyo yang gilo bebini duo tigo ulang apolagi hobi maen betino, pacak keno sita pulo ‘alat kekuasaannyo’,” uji Mat Tebok tekekek-kekek. (*)  Nyedok Kuntilanak Mesti ngolahke soal tuyul, Mat Tebok masih diundang oleh Ujang samo Mat Tombol di kafe hotel. Biasolah, Sabtu malem Minggu banyak pejabat, pamen plisi, kemendan tentro ecak-ecak ado tugas penting ke luar kota. Dak tau mun cuma nak foya-foya samo tino laen di kafe hotel. Mat Tebok melok senang apolagi malem kagek si Ujang samo Mat Tombol yang buka. Belum lagi pejabat, pamen plisi, kemendan tentro tuh ngambur-ngamburke duit samo tino. Mat Tebok begancang pegi ke kafe hotel. Kareno takut telat, Mat Tebok mentas lewat Kuburan Cino. Sepanjang jalan gelap, mano angker pulo. Setau Mat Tebok daerah situ sering dijadike tempat plisi nembak mati bandit yang ditangkep. Di tengah jalan, ado tino bohai make baju putih galo nyetopi mobil kantor yang dibawa Mat Tebok. Lantak, laju bingung Mat Tebok nebak tino bohai tuh ceto kuntilanak. Mun setop, takutnyo kuntilanak itu nyokot Mat Tebok. Mun ngebut, Mat Tebok takut gek bukan kuntilanak, tapi tino bohai, manusio nian yang ditinggalke lanangnyo. Kasihan klo dingangguri pikir ati Mat Tebok. Akhirnyo Mat Tebok nyetopi mobilnyo.“Nak ke mano, Dek?” tanyo Mat Tebok. “Melok, ye. Jalan bae mas bro...” uji tino bohai tu langsung masuk ke mobil. Selo dak selo Mat Tebok nak megang pukang tino bohai tuh. Ruponyo tangan Mat Tebok nembus pukang tino tu. Baru cayo Mat Tebok mun tino bohai itu kuntilanak. Mat Tebok berejo cari akal peranti bebas dari tumpangan kuntilanak. Pas pulo ado restoran.“Dek..kito singgah dukin yo ke restoran.. Kakak laper....” uji Mat Tebok. “Basenglah mas bro.. hihihii..,” uji kuntilanak tu ketawo. Mat Tebok markir mobilnyo agak jauh dari restoran. Terus dio samo kuntilanak masuk langsung mesan nasi. Geleng-geleng palak Mat Tebok jingok kuntilanak tuh mesan makanan banyak nian, pecak dak biso bedake antara laper samo rakus.Sebelum makanan abes, Mat Tebok bisikke tino kuntilanak tuh.“Dek, maaf ye..anak mudo nak ke kamar mandi dukin. Tadi kebanyakan ngebir. Tunggu sebentar ye,” uji Mat Tebok. “Lajulah mas bro,” simbat tino tuh sambil ngabisi makanan.Mat Tebok ecak-ecak bae ke kamar mandi, tapi berejo lari lewat pintu di buri. Mat Tebok ngambek mobilnyo terus pegi ninggalke kuntilanak dewekan di restoran.Pas makanan abes galo, wong yang punyo restoran datang nagih duit makanan. “Galonyo jadi duo ratus ribu,” uji wong yang punyo restoran. Kuntilanak langsung terbang melayang sambil ketawo. “Hihihiiihihihihihihi..hihihihihi.... Tau dak kau. Aku ni kuntinak. Mati kareno bunuh diri kareno dak kuawo jadi gendokan plisi samo tentro “.“Nak mati pegi. Kau kuntilanak, bekas gendokan plisi samo tentro, ato siapo bae, pokoknyo abis makan di sini mesti bayar... Katek cerito barter. Nak bayar dak kau? Sebelum kau kucedok. Jin piaroan aku paling gampang nangkep kau. Lokak kau keno “betet” jin itu sampe mati duo tigo ulang. Mun kau dak kuawo bayar, cuci sendok samo pinggan bae di buri,” ancem wong punyo restoran yang miaro jin, mangkonyo restoran dio laku nian.Tepakso kuntilanak turun, sambil ngerutuk dalem ati.“Iyo, iyo, ampun. Baru nih selamo aku jadi kuntilanak dikongkon nyuci sendok samo pinggan. Awas bae lanang itu (Mat Tebok) mun ketemu, kucokot pekakasnyo,” uji kuntilanak ngancam Mat Tebok yang mungkin lagi asyik bejoget samo “kuntilanak” nyato di kafe hotel.(*/ce1)

Tidak ada komentar: